Arestado ang isa ka security guard sang Cadiz City Hospital kag isa ka pa lalaki sa ginpatigayon nga gun buybust operation kag nakuhaan sang ginapatihan shabu sa sa Crossing Cadiz, Barangay Daga, Cadiz City, Sabado sang hapon, Agosto 8.
Ginkilala ang security guard kay alyas Quin, 57-anyos, residente sang nasamit nga ciudad, kag ang isa nga nadakpan ang ginkilala kay alyas Woodrow, 54-anyos, kag residente sang Brgy. Poblacion 2, Sagay City.
Sa interview sang Bombo Radyo Bacolod kay Police Lt Mansueto De Jose, Deputy Chief of Police sang Cadiz City Police Station, ang mga kapulisan sang Cadiz ang nagpatigayon sang operasyon batok sa loose firearms (RA 10591) nga nagresulta sa pag-aresto sa duha ka persona.
Suno kay Mansueto, narekober sa duha ka mga suspek ang isa ka .38 caliber revolver, wala sang serial number, ginabanta anom ka gramos sang ginapatihan shabu nga nagabalor masobra P40,000, non-drug items kag buybust money.
Ang gwardiya ang empleyado sang provincial government kag madugay na nga ginamonitor sang mga kapulisan antes pa man napatigayunan sang operasyon kag ginakabig nga High Value Individual.
Ang duha ang nakahunong sa Cadiz City Police Station kag magapangatubang sang kaso nga paglapas sa RA 10591 ukon Comprehensive Firearms and Ammunition Regulations Act, kag RA 9165 ukon Comprehensive Dangerous Drugs Act of 2002.
