200 percent ang forecast sang political analyst nga magasaka sa Korte Suprema ang pagpanubo sang numero sang threshold sa number of votes sa impeachment case batok kay Vice President Sara Duterte.
Sa interview sang Bombo Radyo Bacolod kay Atty. Jomax Ortiz, ang bisan sin-o nga indibidwal ang mahimo maka-file sang petition sa Korte Suprema sa pagkwestyon sang nangin desisyon sang Senator-Judges sa pagpanubo sang voting threshold sang impeachment.
Kahapon, ginpanubuan na ang vote threshold nga kinahanglan para sa conviction sa impeachment trial ni Vice President Sara Duterte matapos aprubahan sang Senate impeachment court ang mosyon ni Senator-judge Erwin Tulfo.
13 ka mga Senator-judges ang nagboto pabor, samtang isa ang nagpamatok, nga nagresulta sa pag-overturn sang nauna nga ruling ni Presiding Officer Sen. Francis Escudero.
Gani ang pag-isip sang two-thirds ang igabase na sa mga Senador-judges nga aktibo sa trial.
Samtang indi naman malakip sa isip ang mga Senator-judge nga naka-detain ukon suspendido, legally restrained, indi matumod ang lokasyon, kag may physical ukon medical incapacity.
Madumduman nga sa nauna nga ruling ni Escudero, 16 gikan sa 24 ka Senador ang kinahanglan para sa conviction.
Sa karun, 14 na lamang ang kinahanglan nga boto matapos nga gin-round up ang two-thirds sang 20 ka aktibo nga Senator-judges.
Suno kay Ortiz, ang pagtunga sang duha ka Villar sa Senado ang may pre-negotiated na.
Dugang pa sini nga gindali-dali ni Escudero ang pagdesisyon kahapon bangud bisan gintinguhaan pa ni Senador Alan Peter Cayetano nga i-delay.
Ginalantaw man ang pagpanubo sang voting threshold ang makapadasig sang impeachment trial.
Suno kay Ortiz, ginalantaw niya nga maconvict si Vice President Sara Duterte kun wala sang pagbag-o sa sitwasyon.
