Ginpahayag sang political analyst sa ciudad sang Bacolod nga dapat wala nalang nagbungat sang mga tinaga si Vice President Sara Duterte nga mas makapalain pa sang sitwasyon.
Kahapon, natalana kuntani ang arraignment sa kaso sang bise presidente nga grave threats nga ginpasaka sang Ombudsman sa Sandiganbayan batok sa iya apang ginpaiway bangud sa motion nga gin-file sang kampo sini sa korte.
Kahapon, gintawag ni VP Sara si President Ferdinand Marcos Jr., nga “problema ng bayan” “adik” “kurap” kag dapat na nga magresign sa iya pwesto.
Ini ang kabahin sang statement ni Duterte kasunod sang iya pagtubang sa iya nga mga supporters sa Quezon City Memorial Circle, kahapon nga adlaw, Setyembre 11.
Sa interview sang Bombo Radyo Bacolod kay Atty. Jomax Ortiz, kuntani wala nalang nagbungat sang kaangay nga mga tinaga ang bise presidente bangud mahimo naman ini nga mangin rason sa possible nga pagpangatubang sa kaso.
Dapat suno sa abogado nagahalong ang bise presidente bangud may yara pa sang nagapadayon nga impeachment trial batok sa iya.
