Nagapati ang political analyst sa ciudad sang Bacolod nga nagapreparar na para sa 2028 Elections ang kampo sang Duterte kag Marcos.
Sa interview sang Bombo Radyo Bacolod kay Atty Jomax Ortiz, umpisa palang may-ara na sang indi paghangpanay apisar nga tandem sanday President Ferdinand “Bongbong” Marcos Jr. kag Vice President Sara Duterte sa eleksyon.
Pahanumdom sini nga bisan ang mga cabinet ministers nga kaupod ni Marcos sang eleksyon ang naghalin makaligad lamang sang pila ka bulan sang ini ang magpungko.
Nagapati si Ortiz nga si First Lady Liza Araneta Marcos ang nagadekta kay Presidente Marcos sa mga desisyon partikular na sa mga gina-appoint nga mga tiglikom.
Suno diri, kaangay nga under de saya si Presidente Marcos sa iya nga asawa.
Bangod sini, karun nga makita ang away sa tunga nanday First Lady Marcos kag Vice President Sara Duterte, madamo naman sang nagabasol sa First Lady imbes nga sa mismo Presidente.
Ini matapos nga hayagan nga ginsnob ni Mrs Marcos ang Bise Presidente antes ang ila nga pagbyahe sa luwas sang pungsod.
Nagpabutyag man sang kalain sang buot si Mrs Marcos bangod sa nakita nga pagtambong ni Vice President Duterte sa prayer rally ni former President Rodrigo Duterte, kag nakita sa camera ang pagyuhom sang Bise Presidente samtang ginatawag si Presidente Marcos nga bangag.
Paathag sang abogado nga may kinamatarong man si Vice President Duterte nga magtambong sa prayer rally, ilabi na nga maathag naman ang pagbunggu-anay sa politika sa 2028 Presidential Election.
Suno diri, klaro na nga si Vice President Duterte ang magapapili bilang Presidente, samtang magatakop naman ang termino ni Presidente Marcos.
Ang palamangkutanon sa karun, kun sin-o ang ibunggo sang kampo ni Marcos kag VP Sara bangod maathag man sa mga survey nga wala sang padaog si House Speaker Martin Romualdez.
Sa pihak nga bahin, yara man ang kahangawa nga ang ginaduso nga economic amendments sa 1987 constitution ang front lamang sa tinutuyo nga mapalawig sang dugang nga duha ka tuig ang termino ni Presidente Marcos.
