Gin-aprubahan na sa session sang Sangguniang Panlungsod sang Bacolod ang P77 million nga request ni Mayor Evelio “Bing” Leonardia para sa bonus sang mga empleyado sang ciudad kag iban pa nga mga galastuhan.
Sa interview sang Bombo Radyo Bacolod kay Councilor Cindy Rojas, chairman sang Committee on Appropriations and Finance sa SP, ginpahayag sini nga sa P77-million, P48-million diri ang nakapa-in para sa bonus sang mga empleyado samtang ang P28-million naman ang para sa financial assistance nga ipanghatag sa mga naapektuhan sang road clearing operations kag mga wala nahatag nga sweldo sang iban nga mga empleyado.
Nahibaluan nga makabaton sang tag-40 mil pesos nga bonus subong nga Holiday season ang mga empleyado sang ciudad.
Makabaton ang 1,375 ka mga empleyado sang 5 mil pesos nga Productivity Enhancement Incentives (PEI), 25 mil pesos nga Collective Negotiation Agreement (CNA) nga ihatag pagkatapos sang Disyembre 15 kag 10 mil pesos nga Service Recognition Incentives (SRI) santo sa mando ni Presidente Rodrigo Duterte nga igahatag pagkatapos sang Disyembre 20.
