Ginhangkat ni Pope Francis ang international community nga himuon ang tanan nga sarang nila mahimo agud mauntat ang escalation sa Lebanon.
Gintawag sang Santo Papa nga “unacceptable” ang nagakatabo sa atubang sang iya weekly audience sa St. Peter’s Square.
Nagpabutyag man ini sang pagkamalapit sini sa mga pumuluyo sang Lebanon nga suno sa iya, madamo na ang pag-antos nga naagyan humalin sang una.
Ang Israeli military ang nagapatigayon sang dalagko kag mabug-at nga mga air strikes sang konflikto subong nga semana nga nagatarget sa Hezbollah leaders kag nag-igo sa ginatos nga mga targets sa sulod sang Lebanon.
Humalin sang Lunes sang aga, 569 ka mga persona ang nagkalamatay sa opensa sang Israel lakip na ang 50 ka mga kabataan samtang 1,835 naman ang napilasan sa Lebanon.
Suno kay Foreign Minister Abdallah Bou Habib, kapin tunga sa milyon nga mga pumuluyo ang ginabanta nga nadisplaced sa Lebanon.
Sa Beirut, linibo nga mga persona ang nagbiya sa sur nga bahin sang Lebanon kag nagatinir sa karun sa mga buluthuan kag iban pa nga buildings.
