Ginahulat pa sang gobernador sa Negros Occidental ang resulta sang pagtuon nga ginpatigayon sang duha ka engineer nagikan sa Land and Water Management division sang Department of Agriculture sa posibilidad sang pagpatigayon sang cloud seeding.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, kahapon, ang duha ka engineers amo ang magahatag sang rekomendasyon kun may makita nga gal-om nga sarang mapatigayunan sang seeding, apang ginpahanumdom na sa iya nga magadangat pa sa isa ka bulan ang procurement sa kinahanglanon nga materiales antes mapatigayon ang cloud seeding.
Dugang pa sang gobernador nga dapat man nga mangin mahalong sa desisyon kag maseguro ang matup-an sang ulan, ilabi na nga naga-umpisa na sa pagpamulak ang mga paho sa Guimaras, nga sarang mahalitan inkaso maglab-ot sa ila ang ulan.
Suno sa gobernador, nakalab-ot man sa iya ang impormasyon nga matapos ang El Niño, ang pungsod ang maka-eksperyensya naman sang La Niña sa bulan sang Hunyo ukon Hulyo.
Nagapati si Lacson nga ini ang makabenepisyo sa mga Sugar Cane Farmers, agud nga sila ang makabawi-bawi.
Paathag sini nga kinahanglan lamang nga patubigan ang mga tubo nga bag-o lamang matanom, apang ang mga ini ang makasurvive tubtob sa matapos ang El Niño.
Ginakonsiderar man ni Lacson ang posibilidad sang La Niña sa pagdesisyon kun dayunon ukon indi ang Cloud Seeding.
