Panawagan sang convenor sa Power Watch Negros nga dapat may-ara sang manabat sa mga nagaluntad nga problema sa power distribution sang Central Negros Electric Cooperative (CENECO).
Sa interview sang Bombo Radyo Bacolod kay Wennie Sancho, gin-athag sini nga wala pa sang kaangtanan ang National Electric Power Company (NEPC) sa problema.
Ini bangod ginahulat pa nga mapagwa ang prangkisa agud ang NEPC ang makatrake-over sa power distribution sang CENECO.
Ang kompanya ang magapadulod naman sang P2.5 billion nga magamit sa pag-ilis sa mga daan na nga distribution lines, transformers kag substation.
Ginakwestyon ni Sancho ang masami rasun sang CENECO nga ang brown out ang tuga sang activition sang protective equipment, gani nagtrip-off ang kuryente.
Apang wala man ginahambal kun sin-o ang nag-activate kag wala man ginsugid ang kamatuoran, nga may-ara sang nautod nga primary lines apisar nga sang 2022 lamang na-energize.
Panindugan ni Sancho nga dapat gina-inspect sang National Grid Corporation of the Philippines (NGCP) ang mga proyekto antes hatagan sang clearance bangod kaangay nga substandard ang mga gingamit nga materyales sang CENECO.
Paathag sini nga ang primary lines ang dapat nakabasi sa kadakuon sang power supply nga magalabay kag capacity sang transformer.
Panawagan ni Sancho sa mga empleyado sang CENECO nga updan ang mga nagalibot nga personnel sang MORE Power kag itudlo kun diin ang mga equipment, tranformers kag linya nga defective, agud karun pa lamang mahatagan na sang atensyon.
Indi ini komporme sa ginabuhat sang CENECO nga pagtago-tago sang problema kag paghimo lamang sang mga balibad.
Panawagan ni Sancho sa mga member-consumers nga amo ang makaluluoy nga maghimo sang resolusyon, papirmahan kag ipadala sa Senado sa paghingyo nga mapadasig ang paghatag prangkisa sa NEPC.
Sa pihak sini, dapat man nga imbestigaran kun sin-o gid ang responsible, bangod kun permi na lamang nga wala sang nagapanabat, magapadayun lamang ang kaangay nga problema sa power distribution.
