Gina-abi abi sang Power Watch Negros ang pagtinguha ni Bacolod City Mayor Alfredo “Albee” Benitez nga malabot ang mga natungdan nga ahensya kag mapahagan-hagan ang problema sa power crisis.
Sa interview sang Bombo Radyo Bacolod kay Wennie Sancho, convenor sa Power Watch Negros, ang power crisis ang natrigger sa tuman ka taas nga generation rate sang Wholesale Electricity Spot Market (WESM).
Suno diri, dapat regulated sang Energy Regulatory Commission (ERC) ang power rate, apang wala nalakip diri ang generation charges sang mga generating plant santo sa Electric Power Industry Reform Act (EPIRA).
Ini ang indi maregulate sang ERC bangod ini ang indi makabig nga public utility operation, nga nagtulod sang pagtaas sang presyo.
Pahayag ni Sancho nga pila sa mga electric cooperative, kalakip na ang Central Negros Electric Cooperative Inc. (CENECO) ang nagsalig na lamang sa WESM gani nagsaka ang rate sa P15.12 per kilowatt-hour (kWh).
Ginkumparar naman sini sa MORE Power sa Iloilo may-ara lamang sang balor masobra P11 per kilowatt-hour (kWh) nga rate.
Nagapati si Sancho nga nakapreparar sang iban nga power source ang MORE Power kag ang deficit nalang sa power supply ang ginakuha sa WESM.
Ginalantaw sini nga may team ang MORE Power nga naga-analisar sang dalagan sang power industry kag nagakuha lamang sang power supply sa WESM kun magnubo ang ila nga presyo.
Bangod ang CENECO ang wala sini, gani tuman ang pag-antos sang konsumedor sa mahal nga electricity bill.
Samtang pabor naman ini sa panawagan ni Senator Sherwin Gatchalian nga maghatag sang moratorium sa paghatag sang notices of disconnection kag pagsukot sa staggered basis with interest.
Sa pihak sini, nagapanindugan ang CENECO nga sila ang magapabilin sa pagpatuman sang one bill policy.
Panawagan ni Sancho sa Ceneco nga buligan man ang mga member consumer owner.
