Panawagan sang Power Watch Negros nga indi karun ang tion para magbinasulay sa nagaluntad nga brownout.
Sa interview sang Bombo Radyo Bacolod kay Power Watch Negros convenor Wennie Sancho, wala sang may gusto nga maglupok ang power transformer sang Alijis Substation.
Pahayag sini nga indi na dapat magtinudlu-anay kun sin-o ang balasulon ukon may kapaltahan, sa baylo ini ang tion agud magkooperar sa Negros Electric and Power Corporation (NEPC).
Pahanumdom ni Sancho nga ang kritisismo ang indi man makabulig agud mapadasig ang pagbalik sang power supply.
Paathag sini nga sila ang wala naga-apin sa NEPC, apang nakita nila nga wala man nagapabaya ang korporasyon.
Suno diri, madaan na ang power transformer kag mahimo nga kulang sa maintenance, kag sa karun kinahanglan nagid nga maislan.
Dugang pa ni Sancho nga wala pa nasuguran ang 5-year rehabilitation plan sang NEPC, apang nauna nga naglupok ang power transformer.
Paathag sini nga ang mga daan na nga transformers ang kaangay sang bomba nga bisan ano nga oras pwede maglupok.
Ginalantaw sini nga kun Central Negros Electric Cooperative (CENECO) gihapon ang naga-operar sa power distribution, madugay na nga naathagan nga sila ang wala sang ikasarang sa pagpatigayon sang rehabilitation gani indi nila masarangan ang subong nga problema.
Pahanumdom sini nga ang Power Watch ang number 1 critic pag-abot sa power utility, apang ginalantaw man nila ang tikang sang NEPC.
Dugang pa sini nga ginapahangop man sang NEPC pinaagi sa social media kun ano na ang development kag kun ano pa ang balantayan.
Panawagan sini nga indi na kuntani ulanon sang pagmulay bangod ang mga empleyado sang NEPC ang tawo man kag ginakapoy.
