Ginpatpat sang Donor Recruitment Officer sang Philippine Red Cross Bacolod City- Negros Occidental Chapter ang mga dapat nga tandaan sa pagdonar sang dugo para sa “Dugong Bombo: A Little Pain, A Life to Gain” program sang Bombo Radyo.
Sa interview sang Bombo Radyo kay Mary Joyce Louise Rebadomia, preparado na ang Red Cross sa pag-upod sa Bombo Radyo sa pagconduct sang blood donation kada tuig.
Suno diri, kada bulan sang Nobyembre manubo ang blood supply amo nga ginapasalamat sini ang pagpatigayon sang Bombo Radyo sang blood donation sa Nobyembre 16.
Suno kay Rebadomia, may yara sang guidelines sa pagdonar, dapat naga-edad sang 16 tubtob 65 anyos ang donor samtang kun ang edad naman ang 16 panaog, dapat may yara sang consent form nga pirmado sang ginikanan ukon guardian.
Dapat man nga indi manubo sa 50kg ang kabug-aton; may masobra anum ka oras nga tulog; wala nagkaon sang heavy ukon fatty meal duha ka oras antes ang donation; wala nakadonar sang dugo sa nakaligad nga tatlo ka bulan; wala nag-inom sang makahulubog nga ilomnon sa gab-i antes magdonar; wala nagpanigarilyo lima ka oras antes magdonar; wala nagalain ang pamatyag kaangay sang sip-on, ubo, kag hilanat; samtang mahimo naman makadonar sang dugo ang may highblood basta manubo ang blood pressure sa adlaw sang donasyon kag wala dapat naka-inom sang aspirin ang donor isa ka semana antes magdonate sang dugo.
Samtang, ginpatpat man sini ang benepisyo sa pagdonar sang dugo kaangay na lamang nga makapanubo sang risgo sang heart disease, makapa-improve sang mood kag mental health, may bag-o na naman nga produced nga red blood cells, kag makabulig indi lamang sa ikaayong lawas sang nagdonar apang dako ang bulig sini para sa mga nagakinahanglan sang dugo.
