President Bongbong Marcos, aminado nga naghuyang ang ekonomiya kasunod sang paglabay sang mga bagyo

Gin-ako ni President Ferdinand ”Bongbong” Marcos Jr. nga may pagnubo sa ekonomiya sang pungsod bangud sang mga bagyo nga nag-igo sa Pilipinas kag sa global economic situation.

Ini ang sabat ni Marcos sang ginpamangkot kun ma-recover sang gobyerno ang investor confidence sa tunga sang pagsarurot sang balor sang peso kag pagnubo sang gross domestic product rate.

Sang Myerkules, napagkit ang panibag-o nga record low sang Philippine peso sa tunga sang isyu sang kurapsiyon kag nagsaka ang balor sang US dollar batuk sa kalabanan nga global currencies.

Una na nga ginpahayag sang gobyerno nga nagapatuman sila ang strategic interventions agud mapasaka ang investor confidence kag consumer trust kag sa dalayon, mapasanyog ang economic growth.