Ginpahayag ni President Ferdinand “Bongbong” Marcos Jr nga ang proposed declaration sang food security emergency ang magaduso sa pagnubo sang presyo sang bugas.
Ginalauman ang deklarasyon sang food security emergency sa bugas sa Miyerkules sa tunga sang nagapadayon nga pagsaka sang presyo apisar sa effort sang gobyerno.
Suno kay Marcos, nagapabilin nga mataas ang presyo sang bugas sa merkado apisar sa pagnubo sang cost of production, amo nga kinahanglan nga pwersado nga panuboon ang presyo kag siguraduhon nga naga-gana ang merkado sang insakto.
Gin- aprubahan sang National Price Coordinating Council ang resolution nga nagaduso sa Department of Agriculture (DA) nga magdeklarar sang “food security emergency for rice”.
Samtang, suno kay Trade Secretary Ma. Cristina Roque, chairperson sang NPCC, ang food emergency declaration makahatag sang kahigayunan sa National Food Authority (NFA) para magrelease sang buffer stock agud mastabilize ang presyo.
