Pabor ang presidente sang Bacolod City Public School Teacher’s Federation sa ginaduso sa Senado nga pagreview sa building design sang mga eskwelahan.
Sa interview sang Bombo Radyo Bacolod kay Richard Gelangre, principal sang Bacolod City National High School, ang Gabaldon School Building nga ginpatindog sadtong 1900’s tubtob 1940 ang nakapattern sa bahay kubo, kag gindesinyo nga may dalagko ang bintana nga mas mahangin kag may giha sa idalum agud indi mabatyagan sa sulod sang kwarto ang init gikan sa duta.
Ginpahayag man sini nga gindesinyo ang karun nga mga school buildings agud mangin resilient sa bagyo kag linog, apang wala nalauman nga mangin dako nga problema man ang tuman ka init nga panahon.
Gani suportado sang mga ini nga liwat tun-an ang architectural design sang mga school buildings agud mangin nagakadapat man sa paglala sang climate change.
Samtang suno diri, ginpahayag na sang Department of Education ang posibilidad nga sa 2027 mabalik ang nakaandan nga School calendar kun sa diin naga-umpisa ang klase sa 1st week sang Hunyo.
Paathag ni Gelangre nga amat-amat lamang ang mangin adjustment tubtob makabalik sa 2027.
Pinaagi sini mangin Marso man ang pagtakop sang klase, gani ang init sa bulan sang Marso na lamang nga agwantahon sang mga estudyante.
Nakita man sini nga magluwas sa tuman ka init nga tiyempo bangod sa El Niño, ang mga pagbaha kag mga landslides dala sang La Niña humalin sa Hunyo ang magatuga man sang dugang pa nga kanselasyon sang face-to-face classes.
Gani panawagan ni Gelangre nga dapat magprocure na ang DepEd sang mga tablets, nga durable kag sarang nga magdugay sang lima ka tuig.
Ini bangod nakita na niya nga online learning na ang pasingadtuan sang pag-eskwela, bangod mas mahapos nga makaprovide sang instructional materials indi kaangay sa modules, nga madugay antes matapos bangod magakinahanglan pa sang printing.
Suno diri, bangod ginalauman nga mas magalala pagid ang epekto sang climate change bangod wala man nagakooperar ang mga Industrial countries sa panawagan nga pagpanubo sang carbon footprint, nagapati si Gelangre nga sa masunod, mas madamo na sang klase ang pinaagi sa online kumparar sa face-to-face.
Panugyan man sini ang paghatag sang internet allowance sa mga kabataan kasubong man sa eskwelahan.
Nagalaom si Gelangre nga matun-an sang DepEd ang mga problema kag makapangita sang soluyon agud mapadayun ang paghatag sang kalidad nga edukasyon sa mga kabataan.
