Magahingyo pa sang approval gikan sa District Superintendent sang Department of Education (DepEd) division of Bago City ang Presidente sa Bago City Teacher’s Federation, antes magpagwa sang sabat sa reklamo sang mga retired teachers nga wala nahatagan sang benepisyo.
Ginpadulungan mismo sang Bombo News Team ang balay ni Federation President Jeffmark Lavilles, apang ini ang nagbalibad nga magpa-interview sa panindugan nga siya ang pagapangayo pa sang pahanugot kag magasugilanon pa sa officers sang Federation.
Madumduman nga nagdangop kahapon sa estasyon sang Bombo Radyo Bacolod sanday retired teachers’ Ligaya Jimena, nga nagretiro sang 2020 kag Elsa Valerio nga nagretiro sang 2021.
Suno sa mga ini, ang mga nagretire humalin 2020 tubtob 2023 ang wala nakabaton sang nagakadapat nga benepisyo nga P20,000 nga ila man nga mandatory nga ginabayaran kada tuig, humalin sang nag-umpisa sa serbisyo.
Dugang pa sang mga ini nga hinali nga nagbag-o ang pagsulundan kag ginhimo na nga voluntary ang contribution, rasun nga wala na sang nagbayad sang tinalikdan, gani wala naman sang budget agud ihatag sa mga nagretiro nga manunudlo.
Off the record, ginpahayag ni Lavilles nga humalin sang una, voluntary ang contribution, apang ini ang kaangay nga nangin mandatory bangod ini ang kinahanglan para makabatun sang clearance kada end of school year.
Dugang pa sini nga sang 2018, gindula na ang clearance gani wala naman sang nagbayad sa Federation.
