Gin-athag sang presidente sa Nabaja Foundation nga sila ang nagabulig sa lain-lain nga bahin sang pungsod kag ini ang wala nagpadulong sa Barangay Isio, Cauayan, Negros Occidental para sa politika.
Nahibaluan nga sa pagtuhaw sang Nabaja Foundation sa banwa, naggwa naman ang huring-huring nga si Engr. Jurry Nabaja ang magapapili nga alkalde sa 2025 midterm election samtang si Nabaja naman, ang nagpanumpa naman bilang chairman sa Partido Demokratiko Pilipino–Lakas ng Bayan (PDP-Laban) Cauayan chapter.
Sa interview sang Bombo Radyo Bacolod, gin-athag ni Nabaja nga siya ang tumandok sang Barangay Isio kag naghalin sa imol nga pamilya.
Gani matapos nga nabugayan sang grasya, luyag sini nga mapalab-ogt man ang bulig sa mga pumuluyo sang iya ginhalinan nga banwa.
Paathag sini nga ang Central Office sang Nabaja Foundation ang yara sa probinsya sang Rizal, kag sila ang nagabulig sa mga nagakinahanglan kaangay sang paglupok sang bulkan, nahalitan sang bagyo kag nagakalain-lain pa nga kalamidad sa nanarisari nga bahin sang Pilipinas.
Apang bilang tumandok sa Cauayan, luyag sini nga maka-ambit man ang iya mga kasimanwa sang bugay nga nabatun sini.
Aminado ini nga sadto kada magpuli ini sa banwa, siya ang nasubuan bangod wala sang long term plan ang banwa, gani ini ang nagtukod sang satellite office sang Nabaja Foundation.
Suno diri, sila ang may qualification man nga ginabasehan sa mga ginahatagan sang bulig gikan sa mga nagapadulong sa ila nga foundation.
Bilang STI-West Negros University Alumni President, sila ang may programa man nga nagahatag full scholarship kalakip na sa miscellaneous fee para sa mga Top 1 kag Top 2.
Apang magluwas sa mga ini, sila ang magahatag man sang scholarship sa duha ka estudyante sa tagsa ka Barangay gikan sa 25 ka Barangay sang banwa, kun sa diin on going sa karun ang enrollment sa programa.
Paathag sini nga ini ang iya ginaduso bangod siya mismo ang bunga sang scholarship program, gani ini ang nakatapos sa Mechanical Engineering.
Sa pihak nga bahin, aminado man ini nga indi pa mapaktan kun siya ang magapapili ukon indi sa 2025 midterm Election.
Pasalig sini nga ang tinutuyo lamang sini sa karun kun ngaa yara sa Cauayan, amo ang maghatag sang bulig agud mapa-aayo ang pagpangabuhi sang iya mga kasimanwa.
Sa Marso 23, natalana ang soft launching sang Nabaja Foundation pinaagi sa Caravan.
