Batun na sang Presidente sa Samahang Weighlifting ng Pilipinas kun indi makasulod si Olympic Gold Medalist Hidilyn Diaz sa 2024 Paris Olympics.
Ini matapos nga malutos si Diaz sa Olympic qualifier batok kay Elreen Ando.
Sa interview sang Bombo Radyo Bacolod kay Monico Puentevella, mabudlay na para kay Diaz ang magcompete sa mas mataas nga weight category.
Suno diri, nahatag na ni Diaz ang bugal para sa pungsod bilang labing una nga Olympic gold medalist sa patag sang weiglifting sa sulod sang 97 ka tuig.
Gindumdom sini nga 20 ka tuig na ang nakaligad sang una nga nagpasakop sa Olympic si Diaz sa Beijing, China, nga nasundan pa sang London Olympics, kun sa diin ini lang ang naga-isahanon nga atleta.
Sa Brazil Olympics, nakuha ni Diaz ang silver medal, samtang may nakaupod naman ini nga lalaki nga weightlifter.
Samtang sa Tokyo Olympics, didto na ini nakapauli sang gold medal.
Suno diri, tuman na ka dako ang kontribusyon ni Diaz kag indi mahapos ang pag-angkon sang gold kag silver medal sa Olympics.
Pahayag ni Puentevella nga si Diaz ang nagaserbe nga inspirasyon sang mga masunod nga mga henerasyon sang weighlifters.
Aminado man ini nga wala nagadugay ang career sa sports kag ini ang kinahanglan gid nga buy-an.
Nagasalig si Puentevella nga yara naman si Ando, kag ini ang ikaduha naman nga hampang sang atleta sa Olympics.
Ginalantaw sini ang posibilidad nga magadangat sa apat ang mga mapadala sini nga weighlifters sa Paris Olympics, nga amo ang mangin pinakadako nga numero sang partisipante.
Suno diri, sa karun tatlo pa lamang ang naqualify nga partisipante sa boksing.
Antes paman ang pagkalutos, ginpahayag na sa iya ni Diaz nga bisan sin-o ang magadaog sa ila ni Ando, ang importante amo ang makahatag pasidungog para sa Pilipinas.
