Ginhangkat sang Presidente sang United Sugar Producers Federation (UNIFED) ang mga opisyales sang Department of Agriculture Western Visayas nga magresign na lamang.
Ini kasunod sa anunsyo nga ginahulat na lamang ang go signal gikan sa Department of Agriculture National Office agud mapatigayon ang cloud seeding sa Western Visayas.
Sa interview sang Bombo Radyo Bacolod kay UNIFED President Manuel Lamata, gintawag sini nga wala pulos kag dapat magresign na lamang sa pwesto kag magbalik sa pag-eskwlela ang mga opisyal sang DA.
Madumduman nga nakaligad pa nga binulan nga nagapanawagan ang UNIFED sa pagpatigayon sang cloud seeding apang ini ang wala gin-aprubahan sang DA experts sa panindugan nga wala sang seedable clouds.
Apang suno kay Lamata, kun nakuhaan lamang sini sang litrato ang madamol nga mga gal-om sang Abril, ini ang iya nga ilampos sa ulo sang mga DA experts.
Apang karun nga may-ara na sang mga pag-ulan ulan, ginakahangawa ni Lamata ang posibilidad nga magluntad naman ang baha.
Panindugan sini nga wala sa timing ang desisyon sang DA kun sa diin ginatos ka milyon na ukon mahimo nagadangat na sa billion pesos ang kapierdihan sa sugar industry.
Madamo sa mga katubuhan sa Negros Occidental ang nagkalamatay na, samtang may ara naman sang apisar nakasalbar ini ang nagkunol na kag tuman nalang ka gamay ang maproduce nga kalamay.
Nagalaom naman ini nga kun magapatigayon gid man sang cloud seeding ini ang masalama, bangod sa karun pugtak-pugtak kag makadali lamang ang mga pag-ulan.
