Ginapanawagan sang Presidente sa United Sugar Producers Federation (UNIFED) kay Negros Occidental Governor Eugenio Jose “Bong†Lacson nga magdeklarar na sang state of calamity sa bilog nga probinsya bangod sa kahalitan sang El Niño phenomenon.
Sa interview sang Bombo Radyo Bacolod kay Manuel Lamata, pinaagi sini magamit ang pondo kag makapatigayon sang cloud seeding.
Aminado ini nga nagpahayag na ang gobernador nga indi makapatigayon sang cloud seeding, santo sa abiso sang mga eksperto gikan sa Bureau of Soil and Water Management sang Department of Agriculture.
Apang para kay Lamata, wala sang pulos ang ginapahayag eksperto sang DA bangod apisar nga sila ang nagapahayag nga wala sang seedable clouds, madamo sang makita nga gal-om sa kahawaan, kag may-ara pa sang nagakatabo nga mga pagpanalithi.
Suno diri bangod sa El Niño, madamo sang mga katubuhan nga patay na kag indi na masalbar pa.
Aminado ini nga indi man masaligan ang tikang sang National Government bangod sa masami ini ang malawig nga proseso.
Gani panugyan ni Lamata sa provincial government nga magbakal na lamang, ukon mag-arkila sang eroplano para sa cloud seeding, pinaagi sa magamit nga pondo sa pagdeklarar sang state of calamity.
Sa pihak nga bahin, isa man sa ginarasun kun ngaa mabudlay ang cloud seeding bangod sarang maapektuhan ang mga kapahuan nga nagapamulak sa Guimaras kag San Carlos City.
Suno kay Lamata, gamay lamang ang income sa paho kun ipaanggid sa tubo nga yara sa 280,000 hectares sa bilog nga Negros Occidental.
Pahanumdom sini nga 65 porsyento sang kalamay sa bilog nga pungsod ang nagikan sa probinsya, nga amo ang sugar bowl of the Philippines.
Suno diri, mas makasave ang probinsya sa cloud seeding sangsa pagbakal sang madamo nga mga pump, nga magakuha sang tubig gikan sa mga suba padulong sa mga agricultural lands.
Paathag sini nga bisan mag-alokar ang Provincial Government sang P20 million kag dugangan sang P20 million sang Department of Agriculture, ini ang dako na katama nga budget.
Ginakahangawa ni Lamata nga bangod lunsay patay na ang madamo nga katubuhan, wala na sang makuha nga patdan para sa masunod nga crop season.
Ginalantaw sini nga ang epekto sang El Niño sa sugar supply sang pungsod, ang mabatyagan gid sa masunod nga tuig.
