Gin-anunsyar sang general manager sang Central Negros Electric Cooperative nga may yara sang masobra P1 per kilowatt-hour ang pagnubo sa presyo sang kuryente sa subong nga bulan sang Marso.
Halin sa P11.7856/kWh sang tinalikdan nga Pebrero, sa karun yara na ini sa P10.2279/kWh, umpisa sa reading period sini nga March 16 tubtob 29.
Sa interview sang Bombo Radyo Bacolod kay CENECO General Manager Atty. Arnel Lapore, ang pagnubo sang rate sang kuryente ang tuga man sang maayo nga presyo sa merkado.
Suno kay Lapore, ang pagnubo sa presyo sang kuryente ang behavior lamang sang merkado ukon sang WESM kun sa diin ang CENECO ang isa sa mga nakabenepisyo.
Suno diri, ang iban nga kooperatiba sa probinsya ukon sa rehiyon ang nagnubo man ang rate sa kuryente.
Apang sa pihak sini, nagapanugyan si Lapore nga magkinot sa kuryente bangud indi man mabatyagan ang pagnubo sang rate kun mataas sagihapon ang ginakunsumo sa kuryente.
