Gin-imbitahan sang Sangguniang Panlungsod sang ciudad sang Bacolod ang Bacolod City Water District (BACIWA) sa session agud mahibaloan kun ano ang problema sa natabo nga pagpaandam sa pagpa-untat sang supply sang tubig.
Suno kay Bacolod City Councilor Bobby Rojas, chair sang committee on energy and public utilities, nakibot na lamang ini sang nagpagwa sang statement si BACIWA Chairman Atty. Sonia Verdeflor nga paandam sa posible nga pagkadula sang supply sang tubig bangod wala pa nakabayad ang Primewater sang ila utang sa Bacolod Bulk Water Inc.
Suno diri, namangkot man ini sa Primewater kun ano ang matood nga natabo kag ginhambalan siya nga gina-areglo na ang tanan.
Sa karun, nabaligya na ang Primewater nga ginapanag-iyahan sang pamilya Villar kag pahayag ni Rojas, iga-anunsyar subong nga adlaw kun sin-o ang bag-o nga nagapanag-iya sang Primewater.
