Kritikal ang kondisyon sang principal sang Guinpana-an Elementary School sa banwa sang Moises Padilla nga nadanlog sa hagdan kag nahulog matapos nga manglimpyo sa atop sang classroom.
Sa interview sang Bombo Radyo kay District Supervisor Gideon Panganiban, isa ka semana nga nagpatigayon sang pagpanglimpyo ang eskwelahan kag sang Dominggo amo ang ulihi nga adlaw sang pagpanghimos.
Suno diri, bangod nga nagasaka ang kaso sang dengue luyag sang principal nga si Reynaldo Mojares nga malimpyuhan gid ang eskwelahan.
Nakita sini nga madamo sang natipon nga dahon sa babaw sang classrooms kag mismo siya upod ang isa ka maestro kag isa ka utility worker ang nagsaka sa atop kag nanglimpyo.
Matapos sadto, nag-una na nga nagpauli ang maestro kag ang utility worker apang kapin ala- 6:00 sang gab-i liwat nga nagsaka sa atop si Mojares bangod nga may nabilin pa nga dahon sa babaw.
Pagpanaog ni Mojares natumba ang kahoy nga hagdan gani ini ang nahulog.
Kapin sa 10 ft ang kataason sang gindagdagan sini kun sa diin natam-an ang iya ulo kag nag-agom sang dako nga bukol sa likod sang niya dulunggan.
Gilayon man nga gindala sa ospital ang principal kag ini ang yara sa kritikal nga kondisyon.
