100 percent na nga preparado ang mga manunudlo kag mga school officials sang Handumanan Elementary School 2 para sa pagbukas sang klase subong nga adlaw.
Sa interview sang Bombo Radyo Bacolod kay Leo Ceralbo, school principal sang Handumanan Elementary School 2, preparado na ang mga ini bangud nakapatigayon naman sila sang Brigada Eskwela sa sulod sang isa ka semana agud nga masiguro nga ang mga eskwelahan ang matinluan antes ang klase sang mga estudyante.
Suno kay Ceralbo, ginpapintahan man sini ang tanan nga mga classrooms halin sa kindergarten padulong sa Grade 6 agud nga mapakita sa mga ginikanan nga nakahanda sila nga akumudaron ang mga ini.
Suno diri, nagbutang man sila sang command center sa gate sang eskwelahan agud nga mag-akomodar sang mga late enrollees kasubong man sa mga transferees.
Ginpahayag man sini nga nagsaka ang numero sang enrollees subong nga tuig bangud nagdugang sang isa ka section sa Grade 3 kag Grade 6.
Dugang pa ni Ceralbo nga isa pa sa ginaangan-angan nila sa karun ang pagakomodar sang mga nagaeskwela na nga daan sa nasambit nga eskwelahan nga wala pa nakapaenrol.
Gani nagapanawagan ini sa mga manunudlo kag ginakanan nga ang mga estudyante ipaenrol na nga daan agud malikawan ang pagginutok sang classrooms.
Sa karun bilang pagpanghanda, ginpangrepair na ang mga bangko kag nakahanda naman ang alternatives nga ipatuman agud indi mag overcrowded ang eskwelahan kun kinahanglan.
