(Updated) Nangin positibo ang tugon sang management sang Camella Bacolod South sa Barangay Tangub sa reklamo sang mga homeowners angot sa water supply.
Hwebes, November 6, nagreklamo sa Bombo Radyo Bacolod ang mga nagaistar sa subdivision nga ginapanag-iyahan sang Pamilya Villar bangud duha na ka adlaw nga wala sang tubig. Ini matapos nga nagluntad ang power outage sa Bacolod bangud sa pagwaswas sang Bagyo Tino.
Ang Camella Bacolod South, Camella Mandalagan kag Lumina Homes ang may kaugalingon nga water system paagi sa First Peak Resources and Technologies, Inc. Indi ini konektado sa Bacolod City Water District.
Guba ang generator set nga gamiton kuntani sa pagpasaka sang tubig sa tangke.
Matapos gintalakay sang Bombo Radyo ang reklamo sang mga homeowners sang Hwebes sang udto, nagpadala ang Camella sang generator set pagkahapon agud nga magamit sa pagpasaka sang tubig kag marestore ang supply sa mga pamalay.
Bangud sini, tuman ang pagpasalamat sang mga homeowners sa nangin tikang sang subdivision.
