Kumpormi ang Provincial Consultant on Energy sa Negros Occidental sa pagreview kag pag-amyendar sang Epira Law.
Sa interview sang Bombo Radyo Bacolod kay former Negros Occidental Governor Rafael ‘Lito’ Coscolluela, tuman ka damo sang constraint sa layi nga nagahatag kabudlayan sa paghulag sang mga yara sa power industry.
Suno diri ang Presidente ang nagpahayag nga dapat mapanubo ang bili sang kuryente apang wala man sang maathag nga tikang.
Paathag ni Coscolluela nga dako nga porportion sang bill ang nagakadto sa power generators kun sa diin sa P13 nga per kilowatt hour, P1.18 lamang ang nagakadto sa Central Negros Electric Cooperative (CENECO).
Samtang sang nadula sa grid ang mga coal fired power plants, ang CENECO ang nagbakal naman sang power supply sa Wholesale Electricity Spot Market (WESM) nga gikan sa solar kag biomass energy, nga tuman ka mahal kun sa diin nagdangat sa P10.55 ang initial cost pa lamang kag wala pa ang generation cost, transmission charges kag value added tax (VAT).
Dugang pa sini nga dapat na nga ma-overhaul ang mga 10 tubtob 12 ka tuig na nga distribution systems nga nagatuga sang asod-asod nga brown-out.
Apang ini ang mabudlay ipatuman bangod tuman ka damo sang requirements sang Energy Regulatory Commission (ERC), apisar nga indi man sila ang magahatag sang pondo.
Panugyan sini nga ang gastos sa overhauling ang ipaagi sa 10 year amortization kun sa diin three centavos nga surcharges lamang ang madugang sa tagsa ka bill sang member-consumers.
Agud mahatag ang sustainable power supply, sila ang nagdraft na sang power security roadmap para sa Negros Island Region.
Samtang aminado si Coscolluela nga damo kuntani luyag nga mag-invest sa power industry, apang ang pagtukod sang power plants ang nagakinahanglan sang 600 ka pirma antes maaprubahan.
Bangod sini, madamo sa mga investors ang natak-an nalang kag nagawithdraw sa plano.
Ini ang ginahingyo ni Coscolluela nga ma-amyendahan sa Epira Law.
