BACOLOD CITY – Nagapabilin nga hilway sa bird flu ang probinsiya sang Negros Occidental.
Sa interview sang Bombo Radyo, ginpahayag ni Provincial Veterinarian Dr. Renante Decena nga sang nagligad nga Abril, ginkuhaan sang Avian Flu Task Force sang sample ang mga pispis, manok kag pato sa Barangay Nauhang kag Barangay Gil Montilla sa ciudad sang Sipalay kag sa Barangay Su-ay, ciudad sang Himamaylan.
Ang mga ini ang ginakabig nga migratory site sa probinsiya kun sa diin nagasayo ang mga migratory birds tagsa bulan sang Enero kag Pebrero.
Nakumpirmar, suno kay Dr. Decena, nga negatibo sa bird flu ang probinsiya.
Samtang, agud labi nga masiguro nga indi makontaminar sang bird flu ang Negros Occidental, ginahingyo sang provincial veterinarian ang publiko nga indi magpasulod sang pekin duck nga nagikan sa China kun sa diin may yara sang avian flu.
Samtang, ginpasiguro sang opisyal nga may bastante pa nga supply sang poultry products sa probinsiya sa pihak sang pagdumili sang pagsulod sang manok kag itlog gikan sa Luzon bangud sang bird flu outbreak sa Pampanga.
Suno kay Dr. Decena, wala nagabakal sang poultry products ang probinsiya gikan sa Luzon magluwas sa balut apang gindumili naman ang pagpasulod sini.
Nahibaluan nga ang itlog nga ginakonsumo sang mga Negrense ang gikan sa Roxas kun sa diin humalin Enero tubtob Hunyo, may 2.6 ka milyon ka itlog sang cals nga ginpasulod samtang 1.6 ka milyon naman ang ginapaguwa.
