BACOLOD CITY – May pagtaas sa presyo sang buhi nga baboy kag karne sini sa probinsiya sang Negros Occidental.
Ginkumpirmar ni Provincial Veterinarian Dr. Renante Decena nga yara na karon sa 189 pesos ang average nga presyo kada kilo sang karne sang baboy sa probinsiya.
Ini ang tres tubtb kwatro pesos nga mas mataas kun ikumparar sa nagligad nga presyo.
Paathag sang provincial veterinarian, madamo sa mga nagasagod sang baboy sa Negros Occidental ang nagabaligya sang buhi nila nga kasapatan sa iban nga probinsiya kasubong sang Cebu kag Metro Manila.
Ini bangud mas mataas ang bili sang buhi nga sapat didto bangud magamay ang suplay apang daku ang demand kun ikumparar diri sa probinsiya nga madamo ang suplay sang sapat rason nga mas barato.
Suno kay Dr. Decena, ang mga hog raisers amo ang nagakontrol sang suplay sang karne sang baboy sa merkado bangud sila ang nagapili kun sa diin ibaligya ang mga ini.
Apang ginpasiguro ni Decena nga nag-establisar sila lokal nga mga meat shop agud didto idagdag sang mga manugbaboy ang ila mga sapat.
Samtang, ginpaalinton sang Provincial Veterinary Office nga indi palareho ang bili sang karne sang baboy sa bilog nga probinsiya.
Paathag ni Dr. Decena, may mga lugar nga madamo sang nagasagod sang baboy rason nga mas barato ang karne sa ila lugar kun ikumparar sa mga banwa ukon ciudad nga dyutay lamang ang hog raisers.
