Wala nagakomporme ang provincial veterinarian sang Negros Occidental sa plano sang national government nga mag-import sang karne sang baboy agud mapanubo ang presyo sa merkado.
Ini ang kasunod sang pahayag ni Senador Bong Go nga ginareview sang Office of the President ang executive order angot sa pagtalana sang price ceiling sa karne sang baboy kag manok kag ginadiskusyunan man sang Department of Agriculture ang pork importation agud mastabilize ang presyo.
Suno kay Dr. Renante Decena, nagabungguanay ang desisyon sang local government unit kag national government.
Suno diri, agud indi mangin failure ang food security sa tagsa ka LGUs, nagakadapat nga makigbahin ang Department of Agriculture sa pagsabat sang problema kaangay lamang sang pagtaas sang presyo sang feeds.
Panugyan sini, dapat hibaluon ang problema sang pagsaka sang produkto agud mahatagan sang solusyon.
Ang pag-import sang baboy ang indi mangin solusyon sa problema suno sa iya bangud madugang lang ang problema sang mga breeders.
Suno kay Decena, kun ang problema sa pagsaka sang presyo sang feeds ang bangud sa raw materials, dapat padamuon ang production sang raw materials.
Kasubong man sa pagmahal sang baboy bangud sa kakulangan sang supply kun sa diin dapat buligan ang mga breeders agud mapadamo ang supply sa baylo nga ma-import agud masolbar ang problema.
