BACOLOD CITY — Nagtanyag si Governor Alfredo Marañon nga magabulig ini sa pagpasemento sang runway sang airport sa ciudad sang Sipalay.
Sa inagurasyon kag blessing sang airport, gintanyagan ni Gov. Marañon si Mayor Oscar Montilla Jr. nga handa siya nga abagahon sang provincial government ang katunga sang kagastuhanan samtang ang nabilin nga katunga ang pagasabton naman sang city government sang Sipalay.
Suno sa gobernador, ang Air Juan, nga nagsugod na sa paglupad kahapon, ang may daku nga papel sa pagpasanyog indi lamang sang industriya sang turismo kundi subong man sang ekonomiya sa Sur nga bahin sang Negros Occidental.
Dugang pa sini, indi matakos ang kadakuon sang potential para sa pag-umwad nga sarang maangkon paagi sa amo nga airport.
Samtang, ginpasalamatan naman ni Governor Marañon ang abyan sini nga tag-iya sang eroplano nga si John Anthony Gutierrez.
Suno sa gobernador, si Gutierrez ang may “guts” sa pagbukas sang airport sa Sipalay apang ginpasiguro sini nga wala nagsala ang negosyante bangud sang daku nga potensiyal sang ciudad.
Malipayon naman ang isa ka resort owner sa ciudad sang Sipalay sa pagsugod na sang flights sang Air Juan kahapon nga adlaw.
Ginpahayag ni Anthony Mueller nga isa ka Swiss national, malipayon ini bangud natapos na ang duha ka dekada niya nga paghulat para sa pag-angkon sang mga flight nga magadul-ong kag magasugat sang mga turista gikan sa ciudad.
Nagapati si Mueller nga ang Air Juan ang may daku nga mabulig sa pagpasanyog sang turismo sa ciudad sang Sipalay kun sa diin madamo sang mga tourist destinations, lakip na ang artistic diving resort nga ginapanag-iyahan sini.
Subong nga nadugangan na ang mga transportasyon sa ciudad sang Sipalay, suno kay Mueller, mahatagan na sang katumanan ang madugay na nga handum sang iya mga abyan nga makabakasyon diri paagi sa pagsakay sa eroplano.
Ang dumuluong nga negosyante ang isa sa mga nagtambong sa inaugural flight sang Air Juan kahapon nga adlaw.
Nahibaluan nga si Mueller ang nagapangasawa sang isa ka taga-Kalibo, Aklan kag nagpadulong sa ciudad sang Sipalay agud magnegosyoa sadtong 1997.
