Magapatigayon pa sang public consultation ang Silay City Government sa mga Barangay nga apektado antes magdesisyon kun maghatag sang Resolution Of No Objection (RONO) sa Bulk Water Supply Project sang probinsya sang Negros Occidental.
Sa interview sang Bombo Radyo Bacolod kay Silay City Mayor Joedith Gallego, indi pa ini basta makadesisyon tubtob wala nahibaluan ang panan-awan sang mga apektado nga pumuluyo.
Sa anum ka Local Government Units nga ginalakipan sang ciudad sang Bacolod, Talisay, Silay, Victorias kag banwa sang EB Magalona kag Manapla, ang Silay gid lamang ang wala naghatag sang RONO.
Nahibaluan nga sa P1.2 billion project, isa sa tuyo nga kuhaan sang water supply ang Malogo kag Imbang river.
Matapos ang public consultation sa mga malabayan nga Barangay, kun sila ang magapagwa sang RONO, ini ang ipasa naman sa Sangguniang Panlungsod.
Aminado si Gallego nga wala pa ini nakasugilanon sa konseho kag iya pa sila nga ipatawag.
Suno sa alkalde maayo man nga proyekto ang Bulk Water Supply Project apang ini ang kinahanglan pa niya nga tun-an sang maayo.
