Magapatigayon ang mga manunudlo sa ciudad sang Bacolod sang march rally bilang suporta sa kinamatarong sang mga kababainhan nga manunudlo sa Marso 8 sang hapon, kadungan sa International Women’s Day.
Sa interview sang Bombo Radyo Bacolod kay Richard Gelangre ang presidente sang Bacolod City Public School Teacher’s Federation (BCPSTF), ang march rally sang mga manunudlo ang magaumpisa sa Fountain of Justice, magalibot sa Bacolod Public Plaza kag magabalik sa fountain of justice para sa pagpatigayon simple nga programa.
Suno kay Gelangre, ang march rally nga patigayunon ang may tinutuyo nga magpanawagan sa Department of Budget and Management (DBM) nga mahatagan man sang pagtamod ang panawagan sang mga manunudlo nga salary increase.
Suno diri, ginapanawagan sang mga ini nga ang P27,000 nga sweldo pasakaan ini nga mangin P50,000 bangud ini man ang natabo sa iban nga sektor.
Suno kay Gelangre, sa tion ni anay President Rodrigo Duterte, gindoble sini ang sweldo sang militar, kapulisan kag nurses.
Apang sila nga mga manunudlo ang wala gid magdoble ang ila nga sweldo sabaylo ginpasakaan lamang ini sang P6000.
Suno diri, sang 2016 pa kuntani ipatuman ang pagdoble sa sweldo sang mga manunudlo apang ginpahulat sila bangud kinahanglan nga unahon ang mga uniformed personnel.
Suno diri, kulang ang ginakita sang mga manunudlo bangud bisan ano kakinot indi man gihapon makaigo bangud tuman na kamahal ang mga balaklon sa karun.
Nagalaom man ini nga matabo ang salary increase sa karun sa administrasyon ni President Ferdinand Marcos Jr.
Nagpanawagan man ini sa mga mga manunudlo nga indi na paghulaton ang division memorandum antes magupod sa march rally bangud para man sa ila ang kawsa sini.
