Nakakuha sang authentic nga driver’s license ang pugante nga Indian national nga nadakpan diri sa ciudad sang Bacolod kag naggamit ini sang peke nga passport.
Madumduman nga naaresto sang Hulyo 8 si Joginder Geong ukon kilala man bilang Kant Gupta nga nagapangatubang sang madamo nga kaso sa India nga ginalakipan sang murder, attempted murder, extortion kag robbery kag ini man ang lider sang organized crime syndicate.
Ini ang may sentensya nga life imprisonment bangud sa paglapas sang layi sa nasambit nga pungsod.
Nahibaluan man nga miyembro ini sang Khalistan terrorist group sa India.
Sa interview sang Bombo Radyo kay Police Lt. Col. Joery Puerto, head sang Investigation and Detective Management Unit sang Bacolod City Police Office (BCPO), wala sang salabton diri ang Land Transportation Office (LTO) bangod nga posible nga nag-agi ang suspek sa proseso nga Land Transportation Management System (LTMS) portal sa pagkuha sang driver’s license.
Apang, ang dako diri nga kwestyon amo nga paano nga may peke ini nga passport nga nauyatan nga ginagamit sini sa pagkuha sang driver’s license.
