Kumpirmado nga nagpanginmatay ang pulis nga aksidente nga nakaluthang-patay sa iya suod nga abyan sa bisperas sang paskwa sa ciudad sang Victorias.
Ini ang ginkumpirmar sang hepe sang Victorias City Police Station nga si Police Lt. Colonel Mary Rose Pico, matapos ang ila imbestigasyon kag paguwa sang paraffin test sa tanan nga imbulbado sa insidente sang Disyembre 24, 2019.
Suno kay Pico, may nakuha gid sila nga testigo nga nakakita nga gin-um-om kag ginpalupok ni Patrolman Jonel Lutao, 26-anyos sang Batus Brillantes, Brgy. 1, ang iya armas matapos aksidente ini nga naglupok kag naigo ang iya abyan nga si James Carl Sernal, 26, sang Estrella Village, Brgy. 6 sang nasambit nga ciudad.
Samtang santo sa resulta sang paraffin test, nagpositibo si Sernal apang negatibo si Lutao kag ang duha pa nila ka mga abyan nga upod nila nga nag-inom nga sanday Kelvin John Pedrajas kag Florence John Tianga.
Suno kay Pico, santo sa paathag sa mga nagpatigayon sang paraffin test, posible nga nadula na ang mga polbora sa kamot ni Lutao bangud nga sang naguwa ini sa balay nga ila gina-imnan kag nagluthang ini sa iya kaugalingon, nagtupa ini sa danaw bangud naga-ulan sang nagluntad ang insidente.
Samtang nagpositibo naman si Sernal bangud nga posible sa iya nagtupa ang mga polbora sang naglupok ang armas bangud sang direksyon sang hangin.
Samtang ang duha pa nila ka mga abyan ang maathag nga wala sang kahilabtanan sa insidente.
Santo man sa pagpakighinun-anon ni Pico sa commander ni Lutao sa Regional Mobile Force Batallion sa Iloilo, nahisayran sini kun paano maghatag sang balor sa pag-abyanay ang pulis kag may nakuha man sila nga impormasyon nga antes ang insidente, nakahambal man si Lutao nga kun madula man siya sa sina nga gab-i, malipayon siya bangud nagkilit-anay sila nga mag-abyan.
