Yara na sa kamot sang iya pamilya ang pulis nga ginpatay sang mga katapo sang New People’s Army sa banwa sang Calatrava sang Domingo.
Madumduman nga ang biktima amo si Police Senior Master Sergeant Rommel Aguilar, miyembro sang 3rd Maneuver Platoon sang 1st Negros Occidental Provincial Mobile Force Company.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, nagsugot ang pamilya nga ma-autopsy ang bangkay kag ini ang natapos na kahapon.
Apang aminado so Catalogo nga madugayan pa ang pag-abot sang resulta bangod ini ang ipaidalom pa sa madalom nga pagtuon agud matumod kun paano ginpatay kag iban pa nga detalye sang kamatayon sang pulis.
Madumduman nga alas-7:05 sang aga, una nga nareport nga ginpatay sang anom ka armado nga persona si Armando Ogdamin, 58 anyos nga mangunguma.
Alas-10:50 sang aga, sang magaserbe kuntani sang arrest warrant ang NOCPMFC sa Brgy. Menchaca, naka-engkwentro sang mga ini ang nasambit nga rebelde nga grupo.
Sa pagka-puhag sang kapulisan, didto na nadula si Aguilar, tubtob nga nakabatun sila sang report nga may nasapwan nga bangkay sa Purok 5, Brgy. Laga-an.
Sang ginverify, ini ang nakumpirmar nga ang nadula nga pulis.
Kasunod nga adlaw, nagpagwa sang statement ang NPA, nga sila ang responsable sa pagpatay sa mangunguma nga gina-alegar nila nga espiya sang militar; kag sila man ang naka-engkwentro sang kapulisan kag nagpatay kay Aguilar.
Sa karun, padayun ang manhunt operation sang kapulisan, sa pagkoordinar sa Armed Forces of the Philippines.
Suno kay Catalogo, long firearms ang gingamit sa pagpatay sa mangunguma, nga nagapakita lamang nga wala sang respeto sa kabuhi ang mga rebelde.
Pahayag sini nga madugay na ang attrocities sang NPA sa lugar, kag deserve man sang banwa sang Calatrava sang kalinungan. Samtang, ginalantaw nga indi panapton ni Police Senior Master Sergeant Rommel Aguilar, miyembro sang 3rd Maneuver Platoon sang 1st Negros Occidental Provincial Mobile Force ang gina-alegar police uniform nga ginpost sang rebelde nga New People’s Army sa social media.
Madumduman nga nasapwan patay si Aguilar kasunod sang engkwentro sang 3rd Maneuver Platoon sang 1st NOCPMFC sa anom ka armado nga persona sa banwa sang Calatrava.
Kasunod sini, gin-ako sang NPA nga sila ang may kahimuan sang krimen.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, ang uniporme nga ginpost sang NPA sa social media ang indi parehas sa uniporme nga gina-issue sa mga police personnel.
Luwas diri, ang belt nga kaupod ang indi man belt sang pulis.
Ginalantaw sini nga mahimo uniporme sang iban nga uniformed unit sang gobyerno ang gingamit sang NPA, apang ginatumod pa kun ang armas-luthang ang iya sang biktima….Ginapasalig sang Negros Occidental Police Provincial Office nga tinguhaan nila nga mapadasig ang pagrelease sang mga benepisyo para sa pamilya sang pulis nga ginpatay sang mga katapo sang New People’s Army sa banwa sang Calatrava.
Madumduman nga ang biktima amo si Police Senior Master Sergeant Rommel Aguilar, miyembro sang 3rd Maneuver Platoon sang 1st Negros Occidental Provincial Mobile Force Company.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, sa mga kaangay nga hitabo nga may-ara sang mapatay nga pulis samtang nagaperform sang iya nga pagserbisyo, una gid nga nagapalab-ot sang personal mga bulig ang Provincial Director.
Ginmando naman ni NOCPPO Director Police Col Dennis Wenceslao nga padasigon ang pagproseso sang mga dokumento agud mas mapadasig ang paghatag sang benepisyo sa nabilin nga pamilya ni Aguilar.
Suno kay Catalogo, kalakip diri ang pension para sa nabalo nga asawa kag scholarship para sa kabataan.
Madumduman nga ang 1st NOCPMFC ang magaserbe kuntani sang arrest warrant sa wanted person sa kaso nga rape sang ila nga naka-engkwentro ang anom ka remnants sang rebelde nga NPA, nga una na nga may ginpatay nga mangunguma.
