Nagdangop sa Bombo Radyo Bacolod ang residente sa Purok 4, Barangay Gargato, Hinigaran, Negros Occidental agud ipanawagan kay Mayor Jose Nadie Arceo nga irelease na ang ginapangayo sini nga Mayor’s permit.
Sa interview sang Bombo Radyo Bacolod kay Lucita Libria, siya ang tatlo ka dekada na nga nagahimo sang uga sa banwa, kag sadto paman handom na sini nga makabakal sang duta.
Suno diri, naproseso na sini ang tanan nga requirements kag nakabatun naman ini sang certification gikan sa nanarisari nga ahensya agud maka-operate sang bag-o nga buladan sang uga.
Apang antes paman maka-operar, siya ang ginpasummon ni Arsenio Pagunsan, tag-iya sang kaingod nga beach resort, sa alegasyon nga ini ang mabaho.
Ini ang nagtukod naman sang mataas nga pader, apang siya ang liwat nga ginpasummon ni Pagunsan bangod sa pagpanutod.
Nagahulat na lamang kuntani si Libria nga marelease ang Mayor’s permit, ilabi na nga napasa naman sini ang tanan nga rekisitos kalakip na ang certification gikan sa Municipal Health Office para sa sanitation, apang sabat sang alkalde nga hulaton pa sini ang desisyon ni Pagunsan.
Ginalantaw sang tagreklamo nga ginasaka ni Pagunsan ang opisina sang alkalde ilabi na nga paryentehanay si Arceo kag asawa sini.
Suno diri madamo sang kaangay nga negosyo sa lugar ilabi na nga ginakabig eco-tourism ang Hinigaran.
Pahayag ni Libria nga siya ang may papel nga pirmado sang 127 ka pumuluyo sa lugar, nga nagasugot sa pag-operar sang iya negosyo ilabi na nga ini ang makahatag sang trabaho kag ginabagsakan man sang mga nagadungka nga mangingisda.
