Pabor ang Punong Barangay sang Brgy Banago nga dayunon ang Barangay kag Sangguniang Kabataan Elections (BSKE).
Sa interview sang Bombo Radyo Bacolod kay Kap. Benjamin Baldo, Punong Barangay sang Banago sa ciudad sang Bacolod, mas maayo nga ipatigayunon ang eleksyon agud matuman ang kabubut-on sang mga pumuluyo.
Suno diri, kun luyag sang mga residente nga ilisan ang ila mga opisyal, dapat hatagan sila sang kahigayunan nga makapili pinaagi sa eleksyon.
Ginpahayag man ni Benjamin nga nagaplano siya nga magpadalagan para sa ikaduha nga termino kag nagasalig ini sa iya record sa pagdumala sa nasambit nga barangay.
Suno diri, “aga pa sa banwa,” nagaserbisyo na ini sa barangay sa kada adlaw.
Dugang pa niya, wala siya sang problema kun madayon ang eleksyon kag handa ini nga magpasakop sa desisyon sang mga botante.
Pabor man ang Barangay Kagawad sa Barangay Handumanan, Bacolod City sa postponement sang BSKE.
Sa interview sang Bombo Radyo Bacolod kay Barangay Kagawad Rommel Exanes, pabor ini nga mapostpone ang eleksyon bangod ini ang magastos para sa mga incumbent officials.
Apang aminado man ini nga may mga Barangay officials nga wala nagaperform, gani wala man sang problema sa iya kun madayun gid ang piniliay sa Nobyembre 2.
Panindugan ni Exanes nga ginhatagan sang kahigayunan ang mga opisyal nga magperform kag bisan madugayan pa ang eleksyon ang ila nga performance ang husgaran sang mga pumuluyo.
Desidido naman ini nga magpapili liwat bilang Kagawad apang mangin independent na lamang.
