Ginapatihan nga indi malayo sa balay kun sa diin natabo ang pangpanglampos sang bato sa tatlo ka mga menor de edad sa Hacienda Badiang, Barangay E. Lopez, Silay City ang balay sang may kahimuan sang krimen.
Napauli na sa ila puluy-an ang bangkay sang siyam ka tuig nga bata nga si Desiree Bornales kahapon sang hapon, Pebrero 10.
Sa interview sang Bombo Radyo kay Punong Barangay Joel Valdez Arce sang Brgy E. Lopez, gilayon nila nga ginkadtuan ang pamilya sang maka-abot ang bangkay sang bata agud maghatag sang suporta kag pakig-unong sa pamilya Bornales.
Suno kay Arce, may pila ka mga pumuluyo ang nagpahayag nga ang 15-anyos nga babayi nga biktima ang makapila na nga beses nga makita upod sang iya barkada nga nagatambay sa sulod sang ila balay.
Suno pa diri, ginapahayag nga may ara ini sang tatlo ka barkada nga mga lalaki nga kis-a nagatambay sa sulod sang balay kag naga-inom sang makahulubog nga ilimnon.
Padayon man sa karun nga ginamonitor sang otoridad ang mga barkada sang 15-anyos.
Suno diri, tubtob sa karon wala pa sang may positibo nga willing magwitness nga nagpalapit sa ila nga barangay.
Panugyan sini sa mga pumuluyo ilabi na sa mga ginikanan, nga halongan kag bantayan ang ila nga mga kabataan ilabi na kun oras sang kagab-ihon.
Pasalig naman sang Punong Barangay nga padayon ang pagbantay sang mga otoridad sa pagpabilin sang kalinong kag katawhayan sa nasambit nga lugar.
