Gin-athag sang punong barangay sang Brgy. Bagonawa, San Enrique, Negros Occidental nga indi ini hubog sang tinalikdan nga adlaw kag indi man matuod ang gina-alegar nga pagkastigo sini sa 27 anyos nga special child nga residente man sang barangay.
Sa interview sang Bombo Radyo Bacolod kay Punong Barangay Arlo Aplasca, ginpahayag sini nga wala niya ginkastigo ang manghod sang tagreklamo nga si Ronilo Fernandez, sa baylo ginsaway niya ini bangud nakita niya nga nagapungko sa gwa sang ini ang naggwa sa barangay hall apisar nga may yara sang ginapatuman nga Enhanced Community Quarantine kag curfew sa banwa.
Suno diri, sang ginsaway niya ini, ginhakupan siya sang biktima sang balas nga may dala nga bato kag ginhaboy sa nawong sini antes siya nagdalagan rason nga naka-dusmo ini kag nagtuga sang bukol sa agtang kag sang pagkataktak sang iya ngipon.
Suno diri, kuntani wala lang anay ginpost sa social media ang natabo bangud yara man lang ini sa Barangay Hall agud klaruhon ang natabo.
Ginpanginwala man sini nga gintambagan siya sang mga barangay tanod bangud may ginaubra man sila sang ini ang naggwa sa Barangay Hall.
Suno sa iya, kun magpasaka sang kaso ang pamilya, mapasaka man ini sang kaso.
