Lunsay negatibo ang resulta sang ginpatigayon nga random drug test sa pila ka Bureau of Jail Management and Penology (BJMP) units sa Negros Island Region.
Ini kasunod sang pagpatigayon sang Philippine Drug Enforcement Agency (PDEA) – NIR sang asod-asod nga joint search and seizure operations kag random drug testing activities.
Kalakip sa ginpatigayunan sang aktibidad ang La Castellana Municipal Jail sang Mayo 13.
Kun sa diin lunsay negatibo ang resulta sang drug test sa 27 ka BJMP personnel kag 25 ka persons deprived of liberty (PDLs).
Sa Silay City District Jail Male kag Female Dormitories, 48 ka BJMP personnel kag 190 ka PDLs naman ang gintest sang Mayo 14.
Sang Mayo 16, nagdangat sa 60 ka BJMP personnel kag 150 ka PDLs man ang gindrug test sa Metro Bacolod District Jail–Male Dorm.
Samtang sang Mayo 21, walo ka BJMP personnel kag 43 ka PDLs ang gindrug test sa Talisay City Jail Male kag Female Dormitories.
Duha naman ka operasyon ang ginpatigayon sang Mayo 22.
Ini ginalakipan sang Negros Occidental District Jail–Male Dormitory sa Bago City, kun sa diin tanan nga BJMP personnel kag PDLs ang ginpaidalom sa drug test; samtang 33 naman ang gindrug test sa Dumaguete City Jail–Female Dorm, nga ginalakipan sang 23 ka BJMP personnel kag 10 ka PDLs.
Luwas nga wala sang nagpositibo sa drug test, wala man sang narecover nga mga illegal nga droga kag iban pa nga kontrabando sa sulod sang jail facilities sa nasambit nga mga operasyon.
