Ginpatpat sang General Manager sa Central Negros Electric Cooperative (CENECO) ang duha ka mahimo rasun sa pagtaas sang bill sang kuryente sang tagsa ka konsumedor.
Sa interview sang Bombo Radyo Bacolod kay Atty. Arnel Lapore, ang una nga factor nga mahimo nagpasaka sang bill amo ang pagtaas sang konsumo kun ipaanggid sa nagligad nga bulan.
Suno diri, nga bangod sa tuman nga kainiton mahimo nga halos wala na sang patay-patay ang aircon kag refrigerator sang iban.
Dugang pa sini nga madugay man antes mapabugnaw sang airconditioning unit ang isa ka lugar bangod nagabato ang init, gani mas dako ang power consumption.
Ang ikaduha nga rasun amo ang pagaka sang rate sa kuryente sang P1.90 gani ang per kilowatt hour ang yara na sa halos P12.
Paathag ni Lapore nga ang pagdungan sang duha ka factor ang mahimo nangin rasun sa pagtimbook sang electric bill.
Ginhalimbawa sini mismo ang iya kaugalingon kun sa diin sang tinalikdan P13,000 ang iya nga bill, apang ini ang hinali nga nagsaka sa P19,000.
Suno diri, ang pagsaka sa rate ang tuga sang manubo nga supply, samtang tuman naman ka dako ang demand.
Bangod sini, nagsaka ang rate sa tanan nga mga electric cooperative sa bilog nga pungsod.
Aminado ini nga sa karun nga panahon, mabudlay gid ang magbalanse apang dapat nga tinguhaan nga mapahagan-hagan ang paggamit sang kuryente.
Suno diri, tuman man ang pagbaga sang mga distribution transformer kag ang normal nga makasarang sa pagdistribute sang power supply sa isa ka minuro sa karun ang nagalapaw na sa treshold kag ini ang nagaresulta sa overvoltage.
Sa karun ginatinguhaan na nga ma-upgrade ang capacity sang distribution transformers.
Sa pihak nga bahin, nagpadala naman sang anom ka team ang Negros Electric and Power Corporation (NEPC) nga I-augment sa mga response team sang CENECO sa aga tubtob sa gab-i.
