Nakalantaw na bala kamo sang mga pelikula ukon serye sa diin ang isa ka ordinaryo nga tawo ang nadiskubrehan nga bata sang isa ka manggaranon ukon bata gali sang isa ka prinsipe?
Ini ang nangin real-life fairy tale para sa isa ka 26-anyos nga car salesman sa diin ginhingadlan nga bag-o nga prinsipe sang Belgium matapos ginkilala bilang bata ni Prince Laurent, nga utod ni King Philippe.
Santo sa mga report, opisyal na nga nangin kabahin sang royal family si Clement Vandenkerckhove, isa ka anay car salesman nga may yara sang royal blood.
Sang nakaligad nga tuig, pormal nga ginpakilala ni Prince Laurent, 62-anyos, si Clement sa publiko bilang iya bata.
Ginbun-ag si Clement sa panahon sang pito ka tuig nga relasyon ni Prince Laurent kay Iris Vandenkerckhove, isa ka anay Flemish model nga nangin singer.
Bangud sa pagkilala ni Prince Laurent sa iya nga bata, opisyal na nga may royal title si Clement kag may yara man ini sang claim sa ipanubli nga manggad.
Apang, wala siya nalakip sa line of succession sa pagkahari kag indi man ini makabaton sang royal allowance.
Sa karon, indi pa sigurado si Clement kun iya pagagamiton ang royal name nga van Saksen-Coburg.
Suno diri, ginapabugal sini ang apelyido nga Vandenkerckhove kag ang pagkakas sini sa iya nga pangalan ang daw kaangay nga gintalikdan niya ang tanan nga sakripisyo nga ginhimo sang iya iloy para sa iya.
Ang importante lamang subong para kay Clement amo ang pagkilala sa iya sang iya amay kag gin-share man sini nga pareho sila nga mahilig sa mga salakyan.
