BACOLOD CITY – Ginkumpirmar ni Bacolod Lone District Congressman Greg Gasataya nga may pundo na nga ginpain para sa pagpatukod sang Regional Evacuation Center sa ciudad sang Bacolod.
Ang amo nga regional evacuation center ang nahauna diri sa Negros Island Region matapos mapilian ang Bacolod bilang isa sa mga lugar nga pahamtangan sini.
Suno kay Cong. Gasataya, gilayon magapatigayon sang bidding pananglitan makapirma na sang memorandum of agreement (MOA) sa tunga sang city government sang Bacolod kag Department of Public Works and Highways (DPWH) nga amo ang magapatukod sang estruktura.
Nagpadala sang proposal ang Bacolod kun sa diin ginrekomendar ang Barangay 3, Barangay 16 kag Abada Escay sa Barangay Vista Alegre agud pahamtangan sang regional evacuation center.
Apang sa tatlo ka mga lugar, ang Abada Escay ang may daku nga posibilidad nga pahamtangan sini bangud ang Barangay 3 ang fire-prone area samtang flood-prone area naman ang Barangay 16.
Nahibaluan nga sa Abada Escay man nahamtang ang relocation site sang ciudad sang Bacolod.
