Gina-imbestigaran na ni Land Transportation Franchising and Regulatory Board – Negros Island Region (LTFRB-NIR) Director Atty Gerry Llena kun paano nga may yara sang kakulangan sa lista sang mga drivers kag operators nga makabaton sang fuel subsidy.
Sa interview sang Bombo Radyo kay Llena, antes pa man nag-umpisa ang pagpanagtag sang fuel subsidy, na-antisipar na sini ang matabo amo nga nakig-angot na ini sa mga transport leaders nga maghimo na sang lista agud malikawan ang kinagamo.
Suno kay Llena, siya pa lamang isa ang naga-operate sa LTFRB NIR amo nga indi sini macater ang listahan bangod ang lista yara sa LTFRB Region 6.
Ginhingyo sini ang leader sang transport groups nga ipasa ang lista sa city government sang Bacolod City kag sa Region 6 kag ginrequire sini ang LTFRB Region 6 nga ipasa sa central office ang lista kag amo na nga ginaprocess ang final list nga ipasa sa Department of Social Welfare and Development (DSWD).
Pahayag sini, padayon ang iya imbestigasyon kun diin nag-umpisa nga may kakulangan sa lista amo nga nagpangayo ini sang pag-intindi kun ngaa indi niya masabat ang tanan nga pamangkot sang drivers kag operators.
Samtang, Llena ang tanan nga reklamo sang mga drivers kag operators sang traditional jeepney kag taxi.
Nakigkita ini sa mga transport leaders kag members agud mabatian ang mga sentimento sang ila mga miyembro.
Suno kay Llena, may yara sang mga reklamo sa change of ownership sa unit amo nga may kabudlayan sila sa pagbaton sang ayuda.
Suno diri, dapat mapa-enroll sa LTFRB kun may bag-o na nga nagapanag-iya sang unit agud ma-update ang record apang dapat sa LTFRB Region 6 ini iproseso.
Suno pa diri, may yara man sang pamangkot kun ngaa wala nagapalarehas ang kantidad sang nagakabaton nga fuel subsidy.
Pa-athag ni Llena nga yara na sa national government ang desisyon kun pila ang ihatag sini kag wala siya sang mahimo diri bangod kwarta sang gobyerno ang gina-esturyahan.
Samtang, ginpadangat man sang mga drivers kag operators ang ila kabudlayan nga ang ila pangalan nalista sa malayo nga lugar amo nga may yara sang iban nga wala nakakuha.
Ginpa-athag sang regional director nga posible nagdoble ang pangalan kag sa cross matching isa lang ang ginakuha diri para ibutang sa masterlist.
Pahayag ni Llena, personal ini nga nakigkita sa mga drivers kag operators bangod indi sini luyag nga sila pa ang magpalapit sa iya kun may yara sang problema.
