BACOLOD CITY — Indi matuod ang mga report nga may armado nga mga kalalakin-an nga nagapamangga sang mga manunudlo agud indi makadayon sa pag-report sa eskwelahan sa Sitio Kinabong, Barangay Igmayaan, banwa sang Salvador Benedicto.
Sa interview sang Bombo Radyo, ginpahayag kay Mayor Marxlen dela Cruz nga nagpatigayon sila sang imbestigasyon sa lugar kag iya mismo naistorya ang natungdan nga mga manunudlo sa eskwelahan sa nasambit nga duog apang wala sang nagpahayag nga ginbanggaan sila sang armado nga mga kalalakin-an.
Kumpleto man ang numero sang mga manunudlo sa eskwelahan kag wala man sang residente sa Sitio Kinabong nga nakakita sang mga armado sa amo nga lugar.
Suno kay Dela Cruz, ila naestablisar nga naglapta ang amo nga impormasyon paagi sa text messages kag social media apang indi ini kumpirmado.
Apang sa pihak sini, padayon nga maga-monitor ang lokal nga opisyales sang Barangay Igmayaan kag banwa sang Salvador Benedicto agud masiguro nga wala sang kaangay nga insidente nga matabo.
Ginkumpirmar naman ni Mayor Dela Cruz nga ang Sitio Kinabong isa sa mga pinakamaligwin nga parte sang Barangay Igmayaan.
