Isa ka resolusyon ang ginfile sa Senado nga nagapangagda kay Senator Ronald “Bato” dela Rosa nga boluntaryo nga mag-surrender sa mga otoridad kag magpaidalom sa husto nga proseso sang layi angot sa warrant of arrest nga ginpagwa sang International Criminal Court (ICC) batok sa iya.
Ang Senate Resolution No. 395 ang ginfile nanday Senator Francis “Kiko” Pangilinan, Vicente “Tito” Sotto III, Panfilo Lacson, Risa Hontiveros, kag Bam Aquino samtang nagapabilin nga yara sa Senado si dela Rosa sa idalom sang protective custody.
Madumduman nga sang Lunes, Mayo 11, yara si dela Rosa sa protective custody sang Senado sa idalom sang bag-o nga liderato ni Senate President Alan Peter Cayetano.
Sa resolusyon, ginpahayag sang mga senador nga apisar may gahum kag pribilehiyo ang upper house of congress sa idalom sang Konstitusyon, wala ini nagapahanugot nga magserbe nga santuaryo ukon maghatag sang immunity batok sa pag-aresto sa sin-o man nga miyembro sini.
Ila man ginpaathag nga ang immunity nga ginahatag sang Konstitusyon sa mga senador ang limitado lamang sa mga kaso nga may penalidad nga hindi magsobra sa anum ka tuig nga pagkapriso samtang yara sa sesyon sang Kongreso.
Dugang pa, wala sang probisyon sa Konstitusyon ukon sa Senate Rules nga nagahatag sang gahum sa Senado agud mag-grant sang “protective custody”, institutional refuge, ukon immunity batok sa lawful arrest ukon surrender process.
Ginpanindugan man sang mga senador nga sa mga nakaligad nga mga kaso sang mga anay senador kaangay nanday Juan Ponce Enrile, Leila de Lima, kag Antonio Trillanes IV, ginrespeto sadto sang Senado ang judicial process.
