Ginpanginwala sang Philippine National Police (PNP) ang panawagan nga naggamit sang “shoot-to-kill” approach sa pagpatuman sang warrant of arrest batok kay Senator Ronald “Bato” Dela Rosa.
Suno kay PNP chief General Jose Melencio Nartatez Jr., ila katungdanan nga mapatuman ang layi.
Gin-athag sini nga dapat sundon sa tanan nga operasyon ang due process, human rights, kag rule of law.
Ginklaro man ni Police Col. Allen Rae Co, spokesperson sang Philippine National Police (PNP), nga wala sang may ginpagwa nga shoot to kill order ang PNP batok sa senador.
Ini ang kasunod sang paglapta sang mga peke nga quote card sa social media nga nagapahayag nga nagpanawagan si Cagayan de Oro Rep. Lordan Suan sang “shoot-to-kill” batok sa senador.
Ini ang ginpanginwala man ni Suan kag ginsiling nga wala siya sang may ginbuy-an nga amo nga pahayag.
Samtang, ginmando ni Nartatez sa mga police unit nga padayunon ang intelligence gathering kag monitoring agud matumod ang lokasyon ni Dela Rosa, nga gin-isyuhan sang warrant of arrest bilang co-perpetrator ni former president Rodrigo Duterte angot sa kaso nga crimes against humanity sa ICC.
