Naumpisahan na sang tag-iya sang Dinmark Resort sa Barangay Pahanocoy, Bacolod City ang pagproseso sang ila business permit agud pormal na nga magabukas kag makaoperate.
Sa interview sang Bombo Radyo Bacolod kay Stella Rose Rayos, pinuno sang Permits & Licensing Division sang Bacolod, ginkompirmar sini nga nakaumpisa na sa pagproseso na gawad sang business permit ang nasambit nga resort.
Wala pa ini nakatapos sa pagproseso sang mga dokyumento para sa iya business permit bangud man sa madamo sang compliance kaangay sang city health kag City Environment and Natural Office.
Madumduman nga nangin kontrobersyal ang resort bangud sa ginpatigayon ng foam party kadungan sang blessing sini kag wala nagpatuman sang proper health protocols.
Samtang, ginpatpat man ni Rayos nga antes makaproseso sang business permit sa syudad kinahanglan nga makakuha una sang Barangay Clearance; DTI Business Name Certificate (Single Proprietor); Certificate of SEC Registration / Articles of Incorporation (for Corporation) / Articles of Partnership (for Partnership); Clearances nagikan sa Barangay , Zoning, City Health, Office of the Building Office; Bureau of Fire Protection, Enro, Landtax, kag ang sa mga resort nagakinahanglan sang tourism permit.
Ginpahayag man sini nga halos magkapareho lang ang requirements sang renewal sang permit ilabi na nga nagexpired na ini.
Sa karun maayo naman ang dalagan sang mga nagagawad sang business permit bangud nagadangat naman ini sa 14 mil ka mga business establishments ang mga nagaparehistro.
Suno kay Rayos, ang One Stop Shop sang pagkuha sang business permits ang tubtob pa sa Marso 31, 2021.
Nagpahanumdom man ini sa mga negosyante kag tax payers nga wala pa nakagawad sang business permit nga yara sila sa 4th Floor lang sang Ayala Mall Capitol Central kasubong man sa mga luyag nga makaavail sang 10 percent nga discount sa tion nga magbayad sang bilog nga balayran tubtob lamang sila sa Marso 31, 2021 apang ang mapaslawan nga makaproseso ang pagasukton sang mga penalties.
