Ginapangayo na sang Bacolod City Police Office sa Scene of the Crime Operatives (SOCO) ang resulta sang paraffin test ni Police Lt. Col. Romeo Vargas, ang pinuno sang City Administrative and Resource Management Unit sang Bacolod City Police Office.
Madumduman nga naabtan nga wala na sang kabuhi si Vargas sang emergency rescue team sa sulod sang iya balay sa Purok Zone 12, barangay Handuman sang Mayo 19.
Sa interview sang Bombo Radyo kay LtCol. Eugene Rebadomia, ginpahayag sini nga sila lang duha ni Vargas sang iya kinamagulangan nga bata nga babayi ang yara sa balay sang natabo nga insidente.
Suno diri, ang duha ka bata ni Vargas ang yara sa La Carlota City bangud ang asawa sini ang nagatrabaho bilang principal sa isa ka buluthuan sa ciuad sang La Carlota rason nga didto na sila gapulian.
Suno kay Rebadomia, ang magulang nga bata sini ang yara gatulogan sa extension nga bahin sang ila balay sa barangay Handuman apang wala ini sang may nabatian nga lupok sang natabo ang insidente.
Sa karun, ginpahayag ni Rebadomia nga ginahulat nalang nila ang assesment sang SOCO agud matumod kun gin-utas ni Vargas ang iya kaugalingon nga kabuhi ukon may ara sang foul play.
Natalana nga pagadal-on subong nga adlaw ang bangkay ni Vargas sa BCPO antes ini ihaya sa La Carlota City.
