Ginakalipay sang grupo sang manugbaligya sang palupok sa syudad sang Bacolod ang pahayag ni President Rodrigo Duterte nga pahanugutan ang pagbaligya sang palupok subong nga tuig 2021 basta sa LGUs kag kapulisan lang ibaligya.
Una na nga ginpahayag sang presidente nga dumilian na ang pagbaligya sang palupok sa subong nga tuig apang sang Lunes sang gab-I, nagkambyo ang iya pinsar kag ginpahayag nga pahanugutan ang fireworks basta LGUs kag kapulisan lang ang magamit.
Sa interview sang Bombo Radyo Bacolod kay Ryan Villaruz, presidente sang Bacolod Pyrotechnics Vendors Association, nagapasalamat ini nga magapadayon sila sa pagbaligya sang palupok subong nga tuig kasunod sang ginpahayag sang presidente.
Indi naman sila magpangita sang bag-o nga palangitan-an.
Magasunod man sila sa gihapon sang mga requirements agud nga makakuha sang permit sa pagbaligya sang palupok.
Dako man suno sa iya ang nabulig sang pagbaligya sang palupok sa ila.
Nalipay man ini nga sang tinalikdan nga pagsug-alaw sang bag-ong tuig, ang mga nagbakal sang palupok ang nagsunod sa health protocols kaangay sang pagsuksok sang face shield, facemask kag ang iban ang may yara sang kaugalingon nga alcohol.
Ginalauman man sini nga may yara pa sang pagbag-o sa mga desisyon angot sa pagbaligya-anay sang palupok.
