Nakabaton sang gina-alegar nga pagpamahog ang rookie sang Barangay Ginebra nga si RJ Abarrientos kasunod sang pagkapierde sang team batok sa Meralco sa Game 2 sang PBA Commissioner’s Cup sang Biyernes.
Napierde ang squad ni Abarrientos batok sa Bolts sa score nga 108-104 kun sa diin ang duha ka team ang maga-atubangay sa Game 3, subong nga adlaw, alas- 7:30 sang gab-i.
Sa Game 2, ang rookie sang Barangay Ginebra may tsansa nga mapatas ang game kag makahatag sang extra period kasunod sa late attempt sini para sa four-point arc.
Apang, wala ini natigayon kag naagaw ni Chris Newsome ang rebound kag nahatag ang kadalag-an para sa Bolts.
Sa social media post ni Abarrientos, iya ginbutang nga sobra-sobra na ang mga tawo sa social media nga napierde lang sa pustahanay, may death threat na nga ginahimo kun sa diin nalakip pa ang pamilya sa mga biktima sang pagpamahog.
Suno pa diri, nagahampang sila sang insakto kag nagahimo sang ila trabaho, samtang kabahin na sang basketball ang pagkapierde.
Si Abarrientos may 12 points, three assists, two steals, kag rebound sa Game 2 loss.
